Mae coetiroedd Cymru yn ffynhonnell adnewyddadwy wych o ynni a deunyddiau. Does dim angen troi’r cloc yn ôl rhyw lawer i adeg pan roedden ni’n dibynnu ar goed er mwyn creu ein hadeiladau a rhoi ynni a gwres i’n tai a’n diwydiannau. Mae miloedd o flynyddoedd o gynaeafu gofalus, plannu a rheoli wedi creu’r coetiroedd sydd gennym ni heddiw. Ond ar ôl i’r dulliau traddodiadol o reoli coetiroedd o goed deri, cyll ac ynn ddod i ben yn llwyr yn y 1940au, diflannodd ein tirwedd o dan drwch o blanhigfeydd conwydd masnachol. Rydym ni wedi gadael i’r adnodd gwerthfawr hwn fynd i’r gwellt. Ond mae pobl yn dechrau deall ac yn dangos awydd ac angen i adfer ein coetiroedd brodorol a’u rheoli fel eu bod yn gynhyrchiol a chynaliadwy unwaith eto, ac mae ein cymunedau mewn sefyllfa ddelfrydol i fod yn rhan o’r gwaith hwn.
Mae’r Cymoedd Gwyrdd wedi ysbrydoli nifer o gymunedau i ddechrau rheoli eu coetiroedd lleol unwaith eto. Gyda chynllun rheoli cynaliadwy a llond llaw o sgiliau sylfaenol a pheth dealltwriaeth, mae’r coetiroedd hyn yn cael eu rheoli unwaith eto i gynhyrchu tanwydd pren, siarcol a chynhyrchion coed eraill. Mae’n ffordd wych o gwrdd â phobl newydd, dysgu sgiliau newydd, cael awyr iach ac ymarfer corff wrth wneud rhywbeth gwerth chweil ar y cyd ag eraill.
Gall y Cymoedd Gwyrdd eich helpu chi i:
- Sefydlu grŵp coetiroedd
- Ysgrifennu cynlluniau rheoli ar gyfer coetiroedd er mwyn cytuno beth i’w wneud gyda’r tirfeddiannwr
- Darparu hyfforddiant ar ecoleg coetiroedd ac egwyddorion rheoli
- Darparu hyfforddiant ar sgiliau rheoli coetiroedd a sut i weithio’n ddiogel
Cymorth a chyngor parhaus ar dyfu coed, gwneud gwelliannau er lles bywyd gwyllt a chynnal digwyddiadau mewn coetiroedd lleol.
